Батыс – Алтай мемлекеттік табиғи қорығының жануарлар әлемі
Батыс – Алтай мемлекеттік табиғи қорығының жануарлар әлемі
Батыс – Алтай мемлекеттік табиғи қорығы - аумағы Алтай тау жүйесінің батыс бөлігінде орналасқан. Қорық фаунасы - түрлердің алуан түрлілігімен ерекшеленеді.
Қорық аумағында сүтқоректілердің 57 түрі мекен етеді. Олар 6 отрядқа бөлінеді – жәндік жегіштер, қолқанаттылар, қоянтәрізділер, тұяқтылар, кеміргіштер және жыртқыштар. Сүтқоректілердің 1 түрі «Иконников жарқанаты» - Қазақстанның Қызыл кітабына енгізілген. Қорық аумағында сілеусін, құдыр, бұлан, құну, марал, қоңыр аю, суыр, бұлғын, түлкі, ақкіс, құндыз, кәмшәт, қара күзен, қасқыр, елік, борсық,тиін және т.б. аңдар кездеседі.
Балықтардың 5 түрі бар. Оның ішінде – таймен, Қазақстанның Қызыл кітабына енгізілген.
Қосмекенділердің 2 түрі – сүйіртұмсық бақа, сұр құрбақа, бауырымен жорғалаушылардың 4 түрі – кәдімгі сұржылан, тірі туатын кесіртке, пысық кесіртке, кәдімгі сарыбас жылан мекендейді.
Құстардың 162 түрі мекендейді. Оның ішінде, 120 түрі қорық аумағында ұя салады. Қорықта көп кездесетін құстар: кезқұйрық, жамансары, орман байғызы, меңіреу құр, сұр құр, жорға торғай, қара тоқылдақ, үшсаусақ тоқылдақ, боз суықторғай, бұлбұл, сібір тағанағы және сібір шыбыншысы. Қара дегелек, бүркіт, ителгі, лашын, сұр тырна, үкі - Қазақстан Республикасының Қызыл кітабына енгізілген.
«Батыс-Алтай мемлекттік табиғи қорығы » РММ
Аңшытанушы маманы Ж. Кінәзханов